Custu 11 cabudanni, benides a s’atu de sa Cummissione Indipendèntzia Fossar de les Moreres, a sas oras 12, a Passeig de su Born.
SA DIADA CATALANA 2023 – SNI B’EST CHE A CADA ANNU – Sa Diada Nacional, chi est sìmile a sa nostra Sa Die de sa Sardigna, est sa die in ammentu de s’estrema defensa de sa libertade e de s’indipendèntzia de su pòpulu catalanu chi non s’est istudada cun sa ruta de Bartzellona in sas manos de sas tropas Borbònicas de Tilipu V, acontèssida su 11 cabudanni de su 1714, die chi oe si tzèlebrat a memòria de unu chertu no ancora finidu, cuddu pro sa libertade.
SNI, ischit chi s’istadu ispagnolu est galu franchista cantu cuddu italianu est galu savojardu e fascista, chi no ant a rinuntziare a mai a sa natura issoro annessionista e imperialista ma si amus a èssere unidos ant a rughere ca su benidore devet apartènnere a sos pòpulos e no a sos istados.
SNI, disconnoschet sa costitutzione ispagnola comente at semper disconnotu cudda italiana, in particulare retenet chi s’art. 155, comente a su n.5 de sa Costitutzione Italiana, non tèngiat perunu aspetu de legalidade ma siat petzi un’aparatu pro cunservare sas annessiones cunsighidas cun sa fortza de sas armas e cun sos derramas de sàmbene. Retenet chi su deretu a s’autodeterminatzione siat unu deretu primigenio de ogni colletividade e chi perunu deretu derivadu, comente a s’art. 155 de sa costitutzione ispagnola, lu podat cantzellare.
